Ir-Rabta bejn l-Familja, il-Komunità u l-Iskola ġiet introdotta bħala inizjattiva pilota fl-iskejjel statali Maltin matul is-sena skolastika 2024-2025 u sservi bħala komponent kruċjali tal-Istrateġija tat-Tluq Bikri mill-Edukazzjoni u t-Taħriġ (ELET), li tnediet f’Lulju tal-2023. Din l-istrateġija tallinja mal-għan tal-Unjoni Ewropea, dak li titnaqqas ir-rata tat-tluq bikri mill-iskola għal inqas minn 9% sal-2030.

L-għan ewlieni tal-FCSL fi ħdan l-istrateġija tal-ELET huwa li titnaqqas ir-rata tat-tluq bikri mill-edukazzjoni u t-taħriġ billi tinvolvi, tappoġġja u tagħti s-setgħa lill-istudenti, il-familji u l-edukaturi. Dan jinkiseb permezz ta’ interventi proattivi, appoġġ personalizzat, u trawwim ta’ ambjent kollaborattiv li jagħti prijorità liż-żamma u s-suċċess tal-istudenti.

Dan se jinkiseb permezz ta’:

• Reviżjoni u żvilupp ta’ strateġiji li jnaqqsu r-riskju tat-tluq bikri mill-edukazzjoni u t-taħriġ permezz ta’ kollaborazzjoni ma’ diversi partijiet ikkonċernati biex titwaqqaf sistema ta’ twissija bikrija sabiex jiġu minimizzati l-indikaturi ta’ riskju tal-ELET. 
• Żvilupp ta’ opportunitajiet ta’ ekwità u tagħlim tul il-ħajja għal kulħadd billi jitrawwem approċċ li jinvolvi l-iskola kollha biex jiġi ttrattat l-ELET permezz ta’ politika, riċerka u prattika.
• Iżgurar ta’ edukazzjoni inklużiva u ta’ kwalità permezz tal-iżvilupp tal-ħiliet u l-emanċipazzjoni tal-istudenti, il-ġenituri, il-gwardjani u l-edukaturi kollha.
• Implimentazzjoni ta’ opportunitajiet soċjalment ġusti biex jiżdiedu l-eżiti, iż-żamma u jiġu indirizzati l-iżvantaġġi edukattivi.

Il-programm ta’ Rabta bejn il-Familja, il-Komunità u l-Iskola hija inizjattiva bl-għan li ssaħħaħ il-konnessjoni bejn il-familji, l-iskejjel u l-komunità kollha biex itejjeb ir-riżultati edukattivi u tal-iżvilupp għat-tfal u ż-żgħażagħ.