Id-Direttorat għall-Ippjanar u l-Prospettiva Strateġika fi ħdan il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni qed jippreżenta l-Kampanja EduVoices 2026 ta’ Għarfien dwar il-Benesseri u s-Saħħa Mentali tal-Istudent, li hija inizjattiva nazzjonali li tqiegħed l-vuċi tal-istudenti fiċ-ċentru tal-benesseri u l-iżvilupp edukattiv.

EduVoices 2026 tirrappreżenta impenn strateġiku mid-Direttorat biex il-benesseri jkun integrat bħala pilastru ewlieni tal-eċċellenza edukattiva f’konformità mal-Istrateġija Nazzjonali tal-Edukazzjoni. Permezz ta’ involviment sinifikanti tal-istudenti fis-snin obbligatorji u postsekondarji, l-inizjattiva tirrikonoxxi lill-istudenti bħala parteċipanti attivi fit-tiswir tal-komunitajiet u l-ambjenti tat-tagħlim tagħhom. Din issaħħaħ il-proċess ta’ riflessjoni mill-istudenti u l-espressjoni kreattiva tagħhom permezz ta’ attivitajiet li ġew addattati skont l-età.

Din il-kampanja tmur lil hinn mill-iskop ta’ għarfien. Fil-fatt, tinkoraġġixxi lill-istudenti biex jirriflettu, jikkollaboraw, u jipproponu ideat sinifikanti li jappoġġjaw il-benesseri fl-iskejjel u l-komunitajiet. Il-kampanja tiffoka fuq żewġ riżultati ewlenin:

1. Insaħħu l-vuċi tal-istudenti biex ikun identifikat xi jfisser il-benesseri għall-istudenti.
2. Nippromwovu l-benesseri fl-ambjent tal-iskola permezz ta’ ideat, miżuri, spazji u riżorsi innovattivi, b’appoġġ mill-involviment attiv u sinifikanti tal-istudenti.

Ir-riżultati se jinfurmaw id-direzzjoni strateġika futura u jikkontribwixxu għat-tisħiħ ta’ prattiki inklużivi, sikuri u ffokati fuq il-benesseri fl-iskejjel Maltin, filwaqt li jappoġġjaw ukoll l-isforzi nazzjonali biex jitnaqqas it-tluq bikri mill-edukazzjoni u t-taħriġ.